قامت قيامتى للشاعر عبد الباسط السرسى

قامت قيامتى
علّمنى ابويا ان الحياه
أصعب ما فيها تكون أداه
كلمتين قالهم .. وتاه..............
وف مطلع الجيل الجديد
لعّب صوابعه ع الحديد
درّس العالم حكايته
ازاى بيصنع إله
وازاى بيرسم نهايته
------------------
أول ما مشيت م التحرير
ركّبت للدنيا جناحين
وتَنْك وديل
وقلت أطير
ففتحت باب الدنيا
الدنيا مش عايزه تدور
الدنيا عايزة زقه
جمعت كل الخلق
و .... لسه واقفه
الدنيا روحها محشوره
الدنيا بالعه السنين
الشمس واقفه فى الميادين
نزلت..
بقت فوق راسى بشبرين
(الخلق شربت قعدها
فكّيت لجام صوتى وطِرْت بيه
شقّيت السما للديل
الدنيا جايه .
. ملايكه وشياطين وبنى آدمين
الخلق رايحه جايه
الحياه جوّا الحياه
بصيت عليها بألف عين
------------------

النار بتعلّى بحموها
يطلع غبار
بيغطى الوشوش
دخان كثيف
حيسد عين الشمس
القمر مطَّوَّح بعيد
والدنيا بتضلم
شياطين بتقتل ملايكه
فى الزحام
وملايكة الحسنات
ماشيين إيد ورا وإيد قدام
أرواح بتكنس حلمها
بتصحى فى الأموات
وملوك بتموّت الأحياء
الميتين بيروحوا للصاحيين
تاهت الدنيا فى بعضها
محتار ملك الموت
(حور عين ولِسْتَه بالأسماء)
الأرض بِتْنِز بنى آدمين
أرواح ونازله م السما
وملايكة بتجمّع البيانات
شياطين ناصبين جبلين
كمين مطاريد
بيفتّشوا الطالعين والنازلين
تايهه الملايكه
ومحتاجين لدليل
شارة الملايكه ربَطْتَها
وبحلف اليمين
زَقَّلت طوب فى السما
نزلت كواكبها
محتاج لسطح القمر
يستوعب الزحمة
بصيت عليه ..
مزحوم بروَّاده
فكيت طيّتين م الأرض
وبفك فى التالته
الميه طلعت فوق
غرق اللى فات م الموت
هاتف م السما
عناوين أخبار
مات كل من فى الأرض
ورجعت أرواحهم
ومصيرى لم يحدد بعد
مرّيت على الدنيا
فقابلنى ابن عروس
فَلَكْتُه متعلقه
بيمدّ فى الحكام
واللى بينْهَبوا موروثه
" ولابد من يوم معلوم
" \واخدِنِّى الملايكه لفوق
بيكرمونى
ومركِّبينّى حمار
اشتغلت عليهم
وَقَّعت الملايكه ف بعضها
سحبوا اللجام منى
فاجريت
بين السما والأرض
خبّطت ع الجنه
لقيتها مقفوله
عديت على النار
يااااااه خلق متعدش
فرجعت للدنيا
لامح من بعيد
ثلاث أهرامات
وعياط وصويت
وبهايم وحمير
وبنى آدمين
وشباب تايهه
خبط دماغى الرصيف
فوّقنى
وأنا فى انتظار
فرصةعمل
------------------------